Ноҳияи Тоҷикобод дар маркази Тоҷикистон, водии Рашт, дар соҳилҳои дарёи Сурхоб ҷойгир шудааст. Ноҳия бо якљоякунонии ноҳияҳои Ҳоит ва Қалъаи Лаби Об соли 1949 таъсис ёфтааст. Аз шимолу шарқ бо ноҳияи Лахш, аз шимолу ғарб бо ноҳияи Рашт, аз ҷанубу ғарб бо ноҳияи Сангвор ҳамсарҳад аст. Водии Рашт аз давраҳои қадим азхуд карда шудааст. Дар ҳамвориҳои наздисоҳилӣ аз қадим бо деҳқонӣ машғул буда, дар чарогоҳу марғзорҳои наздикӯҳӣ чорво мечаронанд. Дар даҳсолаҳои охир корҳои ҷустуҷӯӣ дар конҳои маъдан роҳандозӣ гардидаанд.
Шаҳраки Тоҷикобод маркази ноҳия ба шумор рафта, мисли дигар маҳалҳои аҳолинишини ноҳия дар соҳилҳои дарёи Сурхоб ҷойгир шудааст. Масоҳати ноҳия 734,4 км² буда, аҳолиаш ба 56 000 нафар мерасад. Ноҳияи Тоҷикободаз панҷ ҷамоати деҳот - Қалъаи Лаби Об, Зарафшон, Ширинчашма, Нўшор ва Лангари Шоҳ иборат аст. Аксари ҳудуди ноҳияро кӯҳҳо ташкил медиҳанд.

Маконҳои муҳимтарини сайёҳии Тоҷикобод:

Ҷамоати деҳоти Лангари Шоҳ
Дарраҳои Обшорон, минтақаи табиии Кавдал, маҳалли Хушкӯл, мақбараи ҳазрати Мавлавӣ Абдураҳим, мақбараи ҳазрати Эшон.

Ҷамоати деҳоти Қалъаи Лаби Об
Минтақаи куҳии Пётри I, маҳали кӯҳи Сус, қаторкӯҳҳои Пётри I (шикоргоҳ), кӯҳи Сурх, мақбараҳои Ҳазрати Рушноӣ, Эшони Мирзомалик, Муҳаммад Ҳусейн Яъқуб.

Ҷамоати деҳоти Нўшор
Минтақаи истироҳатии деҳаи Нўшор, шаршараҳои Домулло, кӯлҳои Боқӣ, мақбараи Шайх Абдулло, шаршараҳои Чордара.

Ҷамоати деҳоти Ширинчашма
Минтақаи табии Сурхкӯл.

Ҷамоати деҳоти Зарафшон
Мақбараи Шинг

Кандакории рӯи чӯб: ҳифзи ҳунари қадима
Дар Тоҷикобод аз давраҳои қадим ҳунари дуредгарӣ, кандакорӣ дар зарфҳои чӯбӣ, оҳангарӣ, дӯзандагӣ ва заргарӣ рушд кардааст. Ҳама дар бораи он медонанд, аммо кам касон асрори чӣ тавр тайёр кардани онро баладанд. Табақҳои чӯбии тоҷикӣ – табақ ё тавақи чӯбӣ, таърихи чандинасра доранд. Онҳоро тақрибан дар ҳар хонаи тоҷикӣ, ҳам деҳотӣ ва ҳам шаҳрӣ, дидан мумкин аст. Зарфҳои чӯбиро барои таомҳои миллӣ ба мисли қурутоб, шакароб, фатир-шӯрбо ё фатир-маска истифода мебаранд.
Тавақи чӯбӣ барои хӯроки дастаҷамъона истифода мешавад, ғизоро бештар на бо қошуқ, тавре ки одатан қабул шудааст, балки бо даст мехӯранд. Қаблан, табақ, қошуқҳо, муғпарҳо (асбоб барои ороиши нон бо нақш) ва дигар ашёи ошхона дастӣ сохта мешуданд. Ҳоло чунин устоён ангуштшуморанд.

Зарфҳо асосан аз чўби дарахти чормағз, чинор ва тут, баъзан аз бед низ тайёр карда мешаванд. Ин гуна тавақҳоро аз рӯйи рангашон муайян кардан мумкин аст: агар зарф ранги сафед дошта бошад – пас ин бед аст, агар каме зардча бошад – аз тут, сурхтоб бошад – аз чинор ва агар он ранги қаҳваии торик дошта бошад – пас,бешубҳа,аз чормағз аст. Ҳар қадар дарахт пиртар бошад, танаи он васеътар мешавад ва аз он зарфи хуб сохта мешавад. Фақат устувории дарахт имкон медиҳад, ки зарф дар истифодаи аввалин напошад.
Усто бо истифодаи арраи бензинӣ танаи бузургро дар чанд дақиқа бурида, онро ба қисмҳо (дискҳо) ҷудо мекунад. Як чунин диск, ки диаметри он тақрибан 90-100 см аст, ба 4 ҳиса тақсим мешавад, ҳар як порчаи он – тавақҳои оянда мебошад. Сипас, ҳар якеро бо табар метарошад, ин кор дастӣ карда мешавад, то канори табақ борик карда шавад.
Қадами навбатӣ – кор дар устохона аст. Вай маводи тарошидашударо ба дастгоҳ ҷойгир карда, бо корди теғаш каҷ канорҳои табақро метарошад. Усто бояд таваҷҷуҳ кунад, ки табақ на аз ҳад борик ва на аз ҳад ғафс шавад ва бо гузоштани қалам ба маркази зарф, онро чанд карат давр мезанонад. Ҳамин тавр, дар табақ нақшҳо пайдо мешаванд.
Ҳамчунин метавон тавақҳои калонеро сохтан, ки диаметри то 80 сантиметр бошанд, аз онҳо ҳамзамон 7-8 нафар ё бештар метавонанд ғизо хўранд.Табақҳои хурдро барои кӯдакон низ, андозааш бо диаметри 10 см тайёр мекунанд.
Устои табақтарош ҳамзамон ба писаронаш тайёр кардани зарфҳои чӯбиро меомўзонад, то ки ҳунари қадимаи аҷдодонро ҳифз намояд.

Агротуризм
Дар ноҳия картошкапарварӣ, боғдорӣ ва сабзавоткорӣ рушд кардааст. Дар зиёда аз 2000 га замин картошка парвариш карда мешавад. Масоҳати боғҳои ноҳия 1677 га мебошад. Шумораи оилаҳои занбӯри асал тақрибан ба 6600 мерасад.

Дар Тоҷикобод барои меҳмонон ҳамаи шароитҳо муҳайё аст.
Дар айни замон, дар маркази ноҳия як меҳмонхонаи муосир бо тамоми шароитҳо фаъолият мекунад. Дар ин ҷо 43 ҳуҷра мавҷуд аст, ки 6-тои он ҳуҷраҳои дараҷаи люкс мебошанд. Дар дигар ҳуҷраҳо низ ҳамаи шароитҳо барои истироҳати хуби мизоҷон фароҳам оварда шудаанд. Меҳмонхона метавонад то ба 80 меҳмон дар як рӯз хидмат расонад. Нархи ҳуҷраҳо аз 50 то 150 сомонӣ барои як нафар/шабонарӯз мебошад.
Дар ноҳия боз ду меҳмонхонаи муосири дигар вуҷуд дорад, ки барои хидматрасонӣ ба меҳмонони Тоҷикободомодаанд.
Илова бар ин, дар маркази ноҳия нуқтаҳои хидматрасонии бонкӣ, беморхонаи марказӣ ва дар қариб дар ҳар як деҳа марказҳои тиббӣ фаъолият мекунанд.
Ҳамчунин, дар ноҳия 4 нуқтаи хидматрасонии техникӣ, 7 нуқтаи фурӯши сӯзишворӣ, 10 ошхона, 4 каҳвахонаи ғизои зудтайёр, 7 сартарошхона ва дигар марказҳои хидматрасонӣ фаъолият менамоянд.

Анъанахои миллӣ

Дар Тоҷикобод, мисли дигар минтақаҳои кишвар, анъанаҳои халқӣ, аз ҷумла,фолклорро эҳтиёткорона ҳифзу нигаҳдорӣ менамоянд. Дар ноҳия ансамбли "Баёзи Кӯҳистон" фаъолият мекунад, ки он дар ҳамаи чорабиниҳои фарҳангӣ иштирок менамояд. Ансамбл асосан аз навозандагон ва сарояндагон иборат аст. Дар барномаи ансамбл оҳангҳое мавҷуданд, ки зебоии Тоҷикобод, одамони он, дӯстӣ, муҳаббат ба ватани худро васф менамоянд. Ҳамчунин, дигар дастаҳои ҳунарӣ низ ҳастанд. Ба назидикӣ дар ҳудуди ноҳия яке аз калонтарин Қасрҳои фарҳанги минтақаи Рашт ба истифода дода хоҳад шуд.

Чӣ гуна ба ноҳияи Тоҷикобод расидан мумкин аст.

Барои расидан ба ноҳияи Тоҷикобод:
Тавассути ш.Душанбе. Лозим аст, ки аз фурудгоҳи ш.Душанбе то терминал дар канори шарқии шаҳр равед, ки дар он ҷо таваққуфгоҳҳои таксиҳои самти шарқӣ, аз ҷумла, ба Тоҷикобод ҷойгир мебошанд.
Нархи таксӣ аз фурудгоҳ то ҷойҳои номбаршуда тақрибан 3 доллар аст. Одатан таксиронҳо пурра мусофиронро ҷамъ мекунанд ва баъд ба роҳ мебароянд.
Арзиши як ҷой дар таксӣ вобаста ба мавсим тағйир меёбад,ба ҳисоби миёна  тақрибан 15-18 доллар аст. . Дар ҳар сурат, бо таксиронҳо нархро муқаррар кардан лозим аст. Масофа аз ш.Душанбе то маркази ноҳияи Тоҷикобод 234 км мебошад.